ಅಂತಾರಾಷ್ಟ್ರೀಯ ಚಿತ್ರೋತ್ಸವದಲ್ಲಿ ಹಿರಿಯ ನಟಿ ತಾರಾ ಅಭಿನಯದ ‘ಹೆಬ್ಬೆಟ್ಟು ರಾಮಕ್ಕ’

ಚಾಮರಾಜಪೇಟೆಯ ಡಾ. ರಾಜ್‌ ಭವನದಲ್ಲಿ ನಡೆಯುತ್ತಿರುವ ಬೆಂಗಳೂರು ಅಂತಾರಾಷ್ಟ್ರೀಯ ಚಿತ್ರೋತ್ಸವದಲ್ಲಿ ಹಿರಿಯ ನಟಿ ತಾರಾ ಅಭಿನಯದ ‘ಹೆಬ್ಬೆಟ್ಟು ರಾಮಕ್ಕ’ ಚಿತ್ರ ಪ್ರದರ್ಶನ ನಿಗದಿತ ಸಮಯಕ್ಕೆ ಆರಂಭವಾಗದೆ ಪ್ರೇಕ್ಷಕರು ಹಾಗೂ ಅಲ್ಲಿಗೆ ಆಗಮಿಸಿದ್ದ ಪ್ರತಿನಿಧಿಗಳು ತೊಂದರೆ ಅನುಭವಿಸಬೇಕಾಯಿತು.

ಮಧ್ಯಾಹ್ನ 3 ಗಂಟೆಗೆ ಈ ಚಿತ್ರದ ಪ್ರದರ್ಶನ ಆರಂಭಗೊಳ್ಳಬೇಕಾಗಿತ್ತು. ಆದರೆ ಆ ಚಿತ್ರದ ನಿರ್ದೇಶಕ ನಂಜುಂಡೇಗೌಡ ಸಮಯಕ್ಕೆ ಸರಿಯಾಗಿ ಡಾ. ರಾಜ್‌ ಭವನಕ್ಕೆ ಬರಲಿಲ್ಲ. ಹೀಗಾಗಿ ಅರ್ಧ ಗಂಟೆ ತಡವಾಗಿ ಪ್ರದರ್ಶನ ಆರಂಭಗೊಂಡಿತು.

ಮೊದಲ ದಿನದಿಂದಲೂ ಜನ ಇಲ್ಲದೆ ಬಣಗುಡತ್ತಿದ್ದ ರಾಜ್‌ ಭವನದಲ್ಲಿ ಮೊದಲ ಬಾರಿಗೆ ‘ಹೆಬ್ಬೆಟ್ಟು ರಾಮಕ್ಕ’ ಚಿತ್ರ ನೋಡಲು ಜನ ಸೇರಿದ್ದರು. ಚಿತ್ರಮಂದಿರ ಪೂರ್ತಿ ತುಂಬಿದ್ದರೂ ನಿರ್ದೇಶಕರು ಇಲ್ಲದ ಕಾರಣಕ್ಕೆ ಪ್ರದರ್ಶನ ಆರಂಭವಾಗಲಿಲ್ಲ. ಇನ್ನು ಒಂದಷ್ಟು ಹೊತ್ತು ಕಾಯಬೇಕು ಎಂದು ಆಯೋಜಕರು ನಿರ್ಧರಿಸರಾದರೂ ಪ್ರೇಕ್ಷಕರ ಒತ್ತಾಯಕ್ಕೆ ಮಣಿದು ನಿರ್ದೇಶಕರ ಅನುಪಸ್ಥಿತಿಯಲ್ಲಿ ಚಿತ್ರ ಪ್ರದರ್ಶನ ಆರಂಭವಾಯಿತು. ಚಿತ್ರ ಆರಂಭವಾಗಿ ಬಹಳ ಹೊತ್ತಿನ ನಂತರ ನಿರ್ದೇಶಕರು ಬಂದು ಸೇರಿಕೊಂಡರು. ಈ ಚಿತ್ರದಲ್ಲಿ ತಾರಾ ಮುಖ್ಯ ಭೂಮಿಕೆಯಲ್ಲಿ ನಟಿಸಿದ್ದಾರೆ.

ಚಿತ್ರಮಂದಿರದಲ್ಲಿ ಬಹುತೇಕ ಹಿರಿಯ ನಾಗರೀಕರೇ ತುಂಬಿದ್ದರು. ಜತೆಗೆ ವಿವಿಧ ಭಾಗಗಳಿಂದ ಬಂದಿದ್ದ ಪ್ರತಿನಿಧಿಗಳೂ ಇದ್ದರು. ಇವರೆಲ್ಲರೂ ನಿರ್ದೇಶಕರಿಗಾಗಿ ಕಾಯಬೇಕಾಯಿತು. ಕೆಲವರಂತೂ ತೀವ್ರ ಬೇಸರ ವ್ಯಕ್ತಪಡಿಸಿದರು.

ಕೃಪೆ : ವಿಜಯ ಕರ್ನಾಟಕ

Leave a Reply